Месси «Барселона» раҳбариятига шартномасини узайтирмаслиги ҳақида маълум қилди

«Барселона» ҳужумчиси Лионель Месси каталонияликлар билан шартномасини узайтирмаслиги ҳақида маълум қилди, деб хабар бермоқда «Чемпионат».

Хабарда қайд этилишича, аргентиналик футболчи ёзда оиласи билан дам олаётганида ушбу қарорни қабул қилган. Месси яқин танишларидан бири ва отасидан бу ҳақда «Барселона» раҳбариятига маълум қилишни сўради.

29 ёшли футболчи «Барселона»да 2018 йилнинг ёзига қадар давом этадиган шартномасининг охиригача ўйнамаслиги мумкинлигини истисно этмаяпти.

Мессининг қароридан хабар топган «кўк-анор ранглилар» президенти Хосеп Мария Бартомеу ташвишга тушди ва аргентиналик футболчидан режалари ҳақида яхшилаб ўйлаб кўришни сўради.

Аввалроқ Лионель Месси футболчилик фаолиятини ўзининг биринчи клуби – Аргентинанинг «Ньюэллз Олд Бойз» клубида якунламоқчи экани ҳамда каталонияликлар билан янги шартнома имзоланса, у ерга кетиш имконини берувчи банднинг киритилишини истаётгани ҳақида хабар берилганди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.