Facebook’даги «Водители Ташкента (Drivers.uz)» гуруҳида тўй кортежи ва «ЗИЛ» юк машинаси иштирокида муҳокамаларга сабаб бўлган видеолавҳа эълон қилинди.
Видеода Range Rover’лардан иборат (унда бошқа машиналар ҳам бўлиши мумкин, видеода кўринмаган) тўй кортежини йўл ёқасидан «ЗИЛ» юк машинаси қувиб ўтганини кўриш мумкин.
Йўл ёқаси тупроқ бўлгани сабаб, «ЗИЛ»нинг қувиб ўтиши оқибатида чанг-тўзон кўтарилиб, тўй кортежи тупроқли чанг ичида қолган.
Тўй кортежи, катта эҳтимол билан, Тошкент ҳалқа автомобиль йўли бўйлаб ҳаракатланаётган бўлган. Видео айнан қачон олингани ҳақида аниқ маълумот йўқ.
«ЗИЛ» ўзининг бу ҳаракати билан камида қувиб ўтиш қоидаларини бузган (рельссиз транспорт воситаларини фақат чап томондан қувиб ўтиш мумкин) ва Маъмурий жавобгарлик тўғрисидаги кодекснинг 128-моддаси 1-қисми бўйича энг кам иш ҳақининг иккидан бир қисми (12 ноябрь ҳолатига кўра — 74 887 сўм) миқдорида жаримага тортилиши мумкин.
Ижтимоий тармоқда «ЗИЛ»нинг ҳаракатини қоралаганлар етарлича, юк машинаси эгасини олқишлаганлар ҳам талайгина.
Бир гуруҳ фойдаланувчилар тўй кортежлари кўп ҳолларда йўлда бошқа машиналар ҳаракатига халал беришини айтиб, «ЗИЛ» ҳайдовчиси эса бу ҳаракати билан улардан алам олган бўлиши мумкин, деган фикрни ўртага ташлаган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)