Хонанда Жаҳонгир Отажоновнинг концертида бир қанча машҳур меҳмонларни кўриш мумкин эди. Улар орасида алоҳида ажралиб турган соҳирнафас хонанда, Ўзбекистон халқ артисти Насиба Абдуллаеванинг фикрлари билан қизиқиб, журналист Феруз Муҳаммад ундан қисқа интервью олди.
— Хонанда Жаҳонгир Отажоновнинг сўнгги концерт дастурида меҳмон бўлдингиз. Концерт сизда қандай таассурот қолдирди?— Ҳозир залга кирсангиз, залда катта, ақлбовар қилмас энергия бор. Бу энергия унча-мунча санъаткорга берилмайди. Бутун зал, мухлислар уммонга кириб қолгандек айланиб, сузиб, қўшиқларни айтиб, Жаҳонгир қилган ҳаракатларгача бирга қилмоқда. Зал билан саҳнани бирлашиб кетишини мана шу концертда кўрса бўлади. Бундай ҳолат жуда ҳам камдан-кам концертларда ва камдан-кам хонандаларда кузатилади. Жаҳонгирга фақат ва фақат омад, мана шу экспрессиясини, мана шу энергиясини ҳар доим сақлаб қолишини тилайман.
— Концертда Жаҳонгир Отажонов ўзининг «Куз гуллари» номли қўшиғи сизнинг таронангизга ўхшаб қолганини айтиб, бунинг учун сиздан узр сўради. Ростдан ҳам қўшиқлар ўхшашми, бу борада ҳамкасбингизга бирор эътирозингиз борми?— Билмадим, Жаҳонгирнинг ўзи ўхшатган бўлиши мумкин, аммо мен ўхшашлик сезмадим. Нисбатан хотиржам табиатимни ҳисобга олганда, қўшиқларимизни бир-бирига ўхшатиб бўлмайди. Аввало қўшиқлар бир-бирига ўхшаб қолмаган, ўхшаб қолганида ҳам ҳеч қандай эътирозим бўлмасди. Сабаби, бир-бирига ўхшамаган, кераксиз қўшиқлар кўпайиб кетганидан кўра яхши қўшиқларнинг ўхшаш бўлгани маъқул, деб ўйлайман.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)