Испаниянинг «Барселона» клуби Ла Лига президенти Хавьер Тебас ҳамда мамлакат футбол федерациясининг Тартиб-интизом қўмитасига нисбатан суриштирув ишларини олиб бориш борасида Спорт бўйича маъмурий трибуналга шикоят аризасини берди. Бу ҳақда «ТАСС» хабар бермоқда.
Шикоят аризаси «Барселона»нинг «Валенсия»га қарши (3:2) 22 октябрь куни бўлиб ўтган учрашувида каталониялик футболчиларнинг майдондаги хатти-ҳаракатлари танқид қилинганидан сўнг берилди.
«Тебас томонидан айтилган сўзлар масъулиятсиз ва у сингари мутасадди учун лойиқ эмас. Тартиб-интизом қўмитасига келсак, улар футболчиларнинг хулқига изоҳ бермасдан, қарор чиқариши керак. Биз зўравонликни туғдирувчи хатти-ҳаракатлар адолатли жазоланишига умид қиламиз», – деди «Барселона» президенти Жозеп Бартомеу.
«Валенсия»га қарши ўйин якунида Лионель Месси пенальтидан ғалаба тўпини киритганидан кейин каталониялик футболчилар голни рақиб жамоа мухлислари йиғилган трибуна яқинида нишонлади. «Валенсия» ишқибозларидан бири сув идишини футболчилар томон улоқтирди ҳамда Неймар ва Луис Суаресни аниқ нишонга олди. Ҳар икки футболчи чим устига йиқилиб, зарба уларга оғриқ етказганини кўрсатишга уринди.
Учрашувдан сўнг Тартиб-интизом қўмитаси «Барселона»нинг баъзи футболчилари намойиш қилаётган хатти-ҳаракатлар кулгули эканини маълум қилганди.
Изоҳ (0)