Дўстона қўшничилик муносабатларини мустаҳкамлаш мақсадида 26 октябрь куни Ўзбекистон делегацияси Қирғизистонга ташриф буюради. Бу ҳақда «Газета.uz» хабар бермоқда.
Ўзбекистон томонининг таклифи билан 1 октябрь куни Қирғизистон бош вазирининг биринчи ўринбосари Муҳаммадқали Абулғозиев бошчилигидаги қирғиз делегацияси Андижон вилоятига ташриф буюриб, ўзбек-қирғиз муносабатларини мустаҳкамлаш ва ривожлантиришга қаратилган тадбирларда иштирок этган эди.
Ўзбекистон делегациясининг жавоб ташрифи Қирғизистоннинг чегарадош Ўш вилоятига бўлади. Режага кўра, делегация Ўш марказий майдонидаги байрамона маданий тадбирда қатнашиб, Қирғизистон халқлари ассамблеяси вакиллари билан учрашади. Бобур номидаги драматик театрда меҳмонларга «Манаснинг Семетей ўғли» театрлаштирилган постановкаси намойиш этилади.
Ўш марказий майдонида Ўзбекистон делегацияси қишлоқ хўжалик маҳсулотларини кўздан кечириб, Ўш давлат университетининг «Ак буура» ўқув биносига ташриф буюради ва тиббиёт факультети талабалари билан учрашади.
Ташриф якунида делегация вакиллари «Сулайман-Тоо» тарихий-этнографик мажмуасида бўлади. Учрашув якунлари бўйича делегациялар икки томонлама ҳужжатларни имзолаши кутилмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)