18 октябрь куни футбол бўйича Ўзбекистон Олий Лигасида 20-турнинг қолдирилган икки ўйини ўтказилиб, «Локомотив» Муборакда, «Бунёдкор» эса Олмалиқда майдонга тушди.
«Машъал» майдонига сафар этган ва чемпионлик учун асосий даъвогар бўлган «Локомотив» 4:0 ҳисобида зафар қучди. Беллашувда Темурхўжа Абдухолиқов хет-трик қайд этди, Санжар Шоаҳмедов эса ўз номига 1 та гол ёзиб қўйди.
«Олмалиқ» майдонида меҳмон бўлган «Бунёдкор» эса 2 та гол фарқи билан ғолиб чиқди. Япониялик Минори Сато «қалдирғочлар»нинг ҳар икки голига ҳам муаллифлик қилди.
«Бунёдкор» матбуот хизмати маълумотига кўра, бу ғалаба жамоанинг Олий Лига тарихидаги юбилей — 200-ғалабаси бўлди. Юбилей учрашувларни «қалдирғочлар» фақат ғалаба билан якунлаган. Олий Лигадаги илк ўйинда «Вобкент», 50-учрашувда «УзДонгЖу», 100-учрашувда «Машъал», 150-ўйинда эса «Навбаҳор» мағлуб этилганди.
Игорь Шквирин бошчилик қиладиган «Олмалиқ» эса кетма-кет 10 та турдан буён рақибларини мағлуб эта олмади. Иккинчи давра стартидан буён 3 очко олмаган ягона жамоа «Олмалиқ» бўлиб турибди: 1 та дуранг ва 9 та мағлубият. Аввалроқ Игорь Шквирин истеъфога чиқарилиши мумкинлиги тўғрисида хабарлар пайдо бўлганди.
Ўзбекистон Олий Лигаси 20-турнинг қолдирилган ўйинлари 18 октябрь, сешанба
«Машъал» — «Локомотив» 0:4
Голлар: Темурхўжа Абдухолиқов, 17 (0:1). Санжар Шоаҳмедов, 40 (0:2). Темурхўжа Абдухолиқов, 67 (0:3). Темурхўжа Абдухолиқов, 79 (0:4).«Олмалиқ» — «Бунёдкор» 0:2
Голлар: Сато Минори, 32 (0:1). Сато Минори, 39 (0:2).
Изоҳ (0)