Чеченистон раҳбари Рамзан Қодиров Россия Аралаш жанглар санъати (MMA) иттифоқи президенти Фёдор Емельяненконинг 16 ёшли қизига ҳужум қилганларни қаттиқ жазолаш кераклигини айтди, деб хабар бермоқда «ТАСС».
«Бу ғазаблантирадиган ҳодиса ва уни яхшилаб суриштириш, айбдорларни эса қонун бўйича қаттиқ жазолаш керак. Айбдорларни нафақат қизга қўл кўтаргани, балки миллатлар орасида совуқчилик олиб келиш хатти-ҳаракати учун ҳам жазолаш керак», – деди Қодиров.
«Ким бўлишидан қатъи назар, қиз болага қўл кўтарганни инсон, эркак деб бўлмайди. Бу ерда фақатгина жисмоний зарар етказиш, оғриқ бериш ёки тунаб кетиш мақсади қўйилмаган. Катта эҳтимол билан, жамоатчиликда резонанс келтириб чиқариш кўзланган. Қиз болага қўл кўтарганлар унинг ким эканини билган», – дея қўшимча қилди Қодиров.
«Айбдорни қандай бўлмасин топиш керак. Қидирувга барча куч ва имкониятларни ишга солиш лозим. Москвада кузатув камералари ҳар бир квадрат метрни кузатади. Демак, айбдорларни топса бўлади ва топиш керак. Биз ҳам бу йўналишда ишлаяпмиз ва имкон қадар ёрдам беришга тайёрмиз», – деди Қодиров.
Эслатиб ўтамиз, Москва шаҳрида собиқ MMA жангчиси Фёдор Емельяненконинг 16 ёшли қизи Марияга ҳужум қилиниши оқибатида у шифохонага ётқизилган. Мазкур ҳолат юзасидан жиноий иш очилгани, кейинроқ Мария шифохонадан чиққани ҳақида хабар берилганди.
Шундан сўнг, Россия президенти Владимир Путинга Емельяненконинг қизига ҳужум уюштирилгани маълум қилингани ҳақида хабар берилди.
Қайд этиш жоиз, Фёдор Емельяненко 4 октябрь куни Грозний шаҳрида ўтказилган Grand Prix Akhmat 2016 аралаш жанглар турнирида ёш болалар иштирокини танқид қилганди. Кейинроқ «Ахмат» клуби президенти Абузайд Висмурадов Россия MMA раҳбарининг ушбу масала юзасидан танқид қилишга ҳаққи йўқ эканини айтганди. Шунингдек, Чеченистон раҳбари Рамзан Қодиров Емельяненконинг танқидига ўз муносабатини билдирган эди.
Емельяненконинг қизига уюштирилган ҳужум отасининг фаолиятига, хусусан, болалар жангини танқид қилишга боғлиқ экани тасдиқланмади.
Изоҳ (0)