Ўзбекистон миллий терма жамоаси ҳужумчиси Элдор Шомуродовнинг ProSports Management компанияси билан шартнома тузгани ҳақида «Championat.asia» нашри хабардор қилди.
Компания вакили Никита Панасюк «Бунёдкор» клуби аъзоси ҳақида шундай фикрлар билдирди:
«Универсал ҳужумкор футболчи бўлган Шомуродов 21 ёшда. У қанотда ҳам, марказий ҳужумда ҳам, ҳужум ортида ҳам ўйнай олади. Ўйин услуби ва қобилияти жиҳатидан Андрей Ярмоленкони ёдга солади: тезкор, бақувват, техник томонлама кучли, майдонни яхши кўради ва қарши ҳужум вақтида қарорни тез қабул қилади».
«Элдор жисмонан кучли бўлгани учун ҳам кўп рақиблари билан кураша олади. 182 сантиметр бўйга эга ва тез чопа олади. Югуришда бошланғич тезлиги анча яхши. Иккинчи қаватдаги курашларда ҳамда стандарт вазиятларда жуда фойдали».
«Футболчининг дриблинги ҳақида ҳам тўхталиш керак. Битта ўйинда рақибларини ўртача 6 бор алдаб ўтади. Таққослаш учун: ‘Зенит’ аъзоси Жулианода бу кўрсаткич ўртача 5 тани, ‘Спартак’даги Промесда ўртача 8 тани ташкил қилади».
Элдор Шомуродов Ўзбекистон миллий терма жамоаси сафида 12 та учрашув ўтказган бўлиб, 4 та гол уришга муваффақ бўлган. Қўшимчасига, 1 та голли узатмани амалга оширди. Жумладан, Марат Бикмаев ЖЧ—2018 саралаши доирасида Хитой дарвозасини ишғол қилиш учун айнан Элдордан пас қабул қилиб олганди.
«Осиёлик футболчилар янги муҳитга қийин мослашади — деб сўзида давом этди компания вакили. — Аммо Денисов ва Аҳмедовнинг Россиядаги фаолияти бунинг тескарисини кўрсатди. Элдор русчада ёмон гапирмайди, Европага йўл олишни истаса, инглиз тилини ўрганиши керак бўлади».
Шомуродов тўлиқ бўлмаган икки мавсумда «Бунёдкор» учун 19 та гол уриб, 7 та голли пас оширгани қайд этилган. Шунингдек, кучли жамоадаги кучли шериклар билан унинг ўйини олдинга яна битта қадам ташлаши тушунтирилган.
Маълумот учун, Элдор Шомуродов 2015 йилги мавсум якунларига кўра Осиё қитъасининг энг яхши футболчиси бўлиш учун танлаб олинган уч нафар футболчи қаторига кирганди.
Изоҳ (0)