Актёр Йигитали Мамажонов 2 октябрь куни Instagram’даги саҳифасида эълон қилган видеороликка, актёрнинг кўплаб мухлислари қаторида, унинг собиқ турмуш ўртоғи, хонанда Райҳон ҳам муносабат билдирди.
Йигитали Мамажонов Instagram’да қолдирган изоҳига кўра, видеолавҳа 2015 йил 7 октябрь куни, режиссёр Андрей Арутюнов раҳбарлигида суратга олинган. Хивадаги тарихий обидалар ичида олинган роликда актёр мураккаб жангари ва паркур ҳаракатларини, тан олиш керак, маҳорат билан амалга оширганини кўриш мумкин.
Мазкур видеолавҳага Йигитали Мамажоновнинг собиқ турмуш ўртоғи, хонанда Райҳон Ғаниева: «Жуда зўр. Баракалла, Йигитали», — деб муносабат билдирган. Бунга жавобан Йигитали: «Райҳон, раҳмат!», — деб жавоб қайтарган.
Райҳон Ғаниеванинг-да олқишига сазовор бўлган ушбу видеолавҳа қачон, қаерда, нима учун олинганини билиш мақсадида журналист Феруз Муҳаммад актёр билан боғланди.
«Бу қисқа метражли фильм. Унда бошқа бир актёрнинг ўрнига дублёрлик қилганман. Ушбу фильм ‘Ойқиз эртаги’ тарихий эртак-фильмининг суратга олиш ишлари охирида суратга олинган эди», — деди Йигитали Мамажонов.
Маълумот учун, Йигитали Мамажонов ва Райҳон Ғаниева 2012 йил ноябрида турмуш қурган эди, 2014 йил май ойида эса жуфтлик ўғил эгизаклар ота-онасига айланди. 2015 йил январида Райҳон ажрашишга ариза берганини эълон қилди, 2016 йил май ойида эса актёр ва хонанданинг никоҳи расман бекор қилингани маълум бўлди.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)