Ноёб турдаги охирги дарахт бақаси насл қолдирмай оламдан ўтди

Ecnomiohyla rabborum туридаги охирги дарахт бақаси оламдан ўтди. Шу билан яна бир ноёб тур йўқ бўлди, деб хабар беради National Geographic.

Ecnomiohyla rabborum — 62–100 миллиметр ўлчовдаги кичик амфибиялар бўлиб, жигарранг ёки яшил-жигарранг терига эга. Турнинг ўзига хос томонларидан бири итбалиқларга эркакларнинг ғамхўрлик қилишидир. Урғочилар ўсимликларнинг сув билан тўлган қисмларида 60–200 атрофида тухум қўйиб, у ердан дарҳол кетади, уларнинг ўрнини эркаклар эгаллайди. Улар жойидан қимирламайди, итбалиқлар уларнинг таналаридан парчаларни юлиб олиб, шу билан озиқланади. Авлодлари ўзини эплайдиган даражага келганидан сўнг эркак бақалар ҳудудни тарк этади.

Ecnomiohyla rabborum Панаманинг икки провинциясига хос эндемиклар бўлиб, у ернинг денгиз сатҳидан 900–1500 метр баландликдаги ўрмонларида истиқомат қилар эди. Аммо XXI аср бошида улар ёввойи табиатда қолмади: дарахт бақалари Batrachochytrium dendrobatidis замбуруғидан азият чекиб, йўқолиб кетди.

Шундан буён улар ҳайвонот боғларида ва бошқа табиатни қўриқлаш муассасаларида асрай бошланди, аммо замбуруғлар бақаларни у ерда ҳам тинч қўймади. 2016 йилда бу турдаги ягона тирик бақа Тафи (Toughie) лақабли эркак бақа бўлиб, у Атланта ботаник боғида истиқомат қилар эди. Унинг аниқ ёши маълум эмас; 2005 йилда, Панама ўрмонларидан олиб кетилганида, у тахминан 12 ёшларда эди.

Тафи ва унинг ҳамтурлари алоҳида павильонда яшар, ташрифчилар уларни кўра олмас эди. Лекин замбуруғ барча бақаларни зарарлаб улгурган эди. Ecnomiohyla rabborum’ларнинг бари бирин-кетин қирилиб кетди, яқинда эса Тафи ҳам оламдан ўтди ва шу билан бутун бошли тур йўқ бўлди.