АҚШ ҳукумати шу йил бошида Теҳрон бир нечта америкалик маҳбусларни озод этиши эвазига Эроннинг иккита давлат банкига қарши киритилган БМТ санкцияларини олиб ташлашга рози бўлган эди, деб ёзади «ТАСС».
Таъкидланишича, дастлаб, банкларга қарши жазо чораларини 2023 йилгача сақлаб қолиш режалаштирилган эди. The Wall Street Journal нашрининг АҚШ Конгрессидаги манбаларига кўра, Sepah ва (унинг халқаро филиали) Sepah International банкларини БМТ Хавфсизлик Кенгаши санкция рўйхатидан олиб ташлаш жуда аниқ шартларга эга битимнинг бир қисми бўлган.
Унинг шартлари ичига Теҳрон томонидан тўрт нафар америкаликнинг озод этилиши ва Вашингтон томонидан Эронга 1,7 миллиард доллар нақд пул юборилиши кирган. Келишув 17 январь, Эрон турмадан америкалик фуқароларни чиқариб юборган куни амалга ошди, шу куннинг ўзида Хавфсизлик Кенгаши ушбу банклардан санкцияларни олиб ташлади.
Вашингтон аввалроқ тўрт нафат америкаликни қамоқдан озод қилгани эвазига Эронга қандайдир шаклда тўлов тўлаганини рад этган эди. Оқ уй Эронга 1,7 миллиард доллар юборилганини тан олган, аммо бунда гап Эрон 1979 йилда Америка қуроли учун тўлаган маблағни Теҳронга қайтариш ҳақида бораётганини таъкидлаган эди.
Изоҳ (0)