UzMedExpo халқаро кўргазмасининг очилишига бағишланган матбуот анжумани бўлиб ўтди

Тошкентда 26 сентябрь куни UzMedExpo—2016 IX Халқаро тиббиёт кўргазмасининг очилишига бағишланган матбуот анжумани бўлиб ўтди. Бу ҳақда кўргазма ташкилотчиси IEG Uzbekistan «Дарё»га маълум қилди.

Кўргазма 28—30 сентябрь кунлари «Ўзекспомарказ»да бўлиб ўтади.

UzMedExpo—2016 кўргазмасида тиббий, лаборатория, ташхис, реабилитация жиҳозлари ва техникаси, дори-дармон воситалари, сарфланувчи материаллар, жарроҳлик асбоблари, тиббиёт мебеллари, тиббиёт хизматлари, даволаш-соғломлаштириш ва тиббий туризм ишлаб чиқарувчилари ва етказиб берувчилари иштирок этади.

Кўргазмада Россия, Жанубий Корея, Германия, Эрон, Швейцария, Ҳиндистон, Польша, Хитой, Ўзбекистон каби мамлакатларнинг компаниялари иштирок этади. Етакчи мамлакатлар орасида Ўзбекистон, Россия, Германия, Ҳиндистон, Жанубий Корея компаниялари юқори фаоллик кўрсатмоқда.

Шу муносабат билан кўргазмада қуйидаги иштирокчиларнинг тиббий жиҳозларни кенг намойиш этиши алоҳида аҳамият касб этади: BTL Medical Technologies, Ultrasound Scanner Technology Service — Samsung Medison’нинг Ўзбекистондаги расмий дистрибьютори, AB Form Sistem, «Шифо-Нур Сервис», Intermed Innovation — Mindray компаниясининг расмий вакили, Optovik Uni Trade, Sun Gate International, Alflet Injiniring AG, Sanative Best — Ceragem Жанубий Корея компаниясининг расмий дистрибьютори ва бошқалар.

Кўргазмага ташриф буюрувчилар анъанавий равишда маҳаллий ишлаб чиқарувчиларнинг кенг миқёсдаги тиббий мебел маҳсулотлари билан танишишлари мумкин. Бу йил тиббий мебел маҳсулотлари намуналарини Stekloplastic, Sun Gate International, AB Form Sistem намойиш этади.

Кўргазмада илк бор Тиббий туризм бўлимида Bayern Osteuropa OHG компанияси иштирок этмоқда, у Германия ва Европадаги етакчи клиникаларда ташхисни ташкил этиш, даволаш ва реабилитация соҳасидаги тажрибали ва илғор корхоналардан биридир.

UzMedExpo—2016 кўргазмасининг яна бир қизиқарли бўлими «Гўзаллик ва саломатлик» сексияси бўлиб, у гўзаллик индустрияси, эстетика тиббиёти ва пластик жарроҳлик соҳаларидаги етакчи ишлаб чиқарувчилар ва вакилларни ўз ичига олади.