Австралия шарқидаги Квинсленд штатининг марказий туманлари аҳолиси 26 сентябрь, душанба куни кечқурун ноодатий табиий ҳодисага гувоҳ бўлди — осмонда ёрқин нур пайдо бўлиб, сўнг портлаш кузатилди, деб ёзади «ТАСС».
Квинсленд полициясига Глэдстоун, Грейсмир ва бошқа кичик шаҳарлар аҳолисидан кўп сонли қўнғироқлар келиб тушган, улар ярим тунда осмон бирдан ёришиб, уйлари силкинганини, сўнг узоқда портлаш овози эшитилганини айтган. Воқеа гувоҳларининг баъзилари осмонда оловли шарни кўрганини таъкидлаган.
Ўз навбатида миллий геохизмат ушбу вақтда бу туманда зилзила қайд этилмаганини аниқлаштирди.
Астрофизик Жонатан Макдауэлл гап метеорит ҳақида бораётганини тахмин қилди. У тошнинг ўлчами 1 метрга яқин бўлиши мумкинлигини айтди.
Полиция ҳодиса натижасида қурбонлар ва вайронагарчиликлар ҳақида хабар келиб тушмаганини таъкидлади.
Изоҳ (0)