Гренландияда музлар эриши натижасида совуқ уруш давридаги махфий Америка базаси фош бўлди, деб ёзади «ТАСС». У ерда сақланган ракеталар Совет Иттифоқига қарши қўллаш учун мўлжалланган.
Эриётган муз ва қор билан бирга, океанга энди чиқинди сув, полихлорланган бифениллар ва радиоктив чиқиндилар оқиб тушмоқда.
«Музнинг эриш суръатига кўра, база 2090 йилдан аста-секинлик билан кўз олдимизда намоён бўла бошлайди, унинг қурувчилари эса у криосферада абадий яширинган, деб умид қилган эди», — деди Канаданинг Йорк университети гляциологи (музшуноси) Уильям Колген. У Гренландиядаги эҳтимолий экологик офат ҳақида маъруза тайёрлаган олимлар гуруҳини мувофиқлаштирган эди.
1959 йилда Америка армияси муҳандислари АҚШ ҳарбий-ҳаво кучларининг Туладаги базасидан тахминан 200 км узоқликда Арктикани тадқиқ қилиш бўйича лабораториялар мажмуасини қуришни бошлади. Яна уч йилдан сўнг худди шу ерда 600 та баллистик ракетани омборга жойлаштириш бўйича Iceworm («Муз қурти») лойиҳасини амалга ошириш ишлари бошланди. Кейинроқ муҳандислар муз кўчаётганини аниқлаб, қазилган туннеллар вайрон бўлиши мумкин, деган хулосага келди. 1967 йилда шу сабабга кўра лойиҳа ёпилди, ядро реактори эвакуация қилинди, бироқ чиқиндилар қолиб кетди.
Баъзи даниялик экологлар ҳудудни тозалаш бўйича операция ўтказилишини талаб қилмоқда. 1951 йилда АҚШ ва Дания (мухтор Гренландия унинг таркибига киради) Гренландияни мудофаа қилиш ҳақида битим тузган, аммо унда ушбу ракеталар тилга олинмаган.
Изоҳ (0)