Сноуден Google’нинг янги мессенжерини ўчириб ташлашга ва ишлатмасликка чақирди

Америка махсус хизматлари собиқ ходими Эдвард Сноуден Google’нинг янги Allo мессенжерини «ўчириб ташлашга ва ишлатмасликка» чақирди. Ушбу дастурнинг хавфлилиги ҳақида у ўз Twitter’ида маълум қилди.

Сноуденнинг сўзларига кўра, Google’нинг дастури ҳар битта юборилган хабарни ёзиб олади ва фойдаланувчи маълумотларини полиция сўрови бўйича тақдим этади. «Allo’дан фойдаланманг», — деб ёзди у.

21 сентябрь куни ишга туширилган Allo мессенжерига фойдаланувчилар мулоқотини кузатиб, уни кейинроқ таҳлил қилиш учун сақлаб қўядиган бот ўрнатилган. Google’дагилар бу дастурни фойдаланувчилар учун янада қулайроқ қилиш имконини беришини айтди.

The Independent ёзишича, аввалроқ компания фойдаланувчиларнинг махфий ёзишмалари вақтинчалик сақланишини ва маълум муддатдан сўнг ўчирилишини таъкидлаган эди. Аммо Google қарорини ўзгартириб, энди фойдаланувчиларнинг барча суҳбатларини ёзиб олмоқчи ва сақлаб қўймоқчилиги маълум бўлди.

«Биз фойдаланувчиларга Google Allo’даги ўз маълумотлари устидан назоратни бериб қўйдик, — деди Google вакили. — Бизнинг ёндашувимиз оддий — ёзишмалар тарихи сиз уни ўчиришга қарор қилмагунингизча, сиз учун сақланиб туради».

Free for download today: Google Mail, Google Maps, and Google Surveillance. That's #Allo. Don't use Allo. https://t.co/EdPRC0G7Py

— Edward Snowden (@Snowden) September 21, 2016