АҚШ вице-президентлигига номзод Пенс соғлиғи ҳақидаги маълумотларни эълон қилди
АҚШ вице-президентлигига Республикачилар партиясидан номзод Майкл Пенс соғлиғи ҳақидаги шифокор маълумотномасини эълон қилди. Бу ҳақда Associated Press агентлиги маълум қилди, деб ёзади «ТАСС».
Шифокор Майкл Баск томонидан берилган қайдномада 57 ёшли Пенснинг соғлиғи жуда яхши эканлиги айтилган. Республикачини кўрикдан ўтказган Баск Индиана штатининг губернатори бўлган Пенс соғлом ҳаёт тарзига риоя этиши, чекмаслиги ва алкоголь истеъмол қилмаслиги ҳамда ҳафтасига камида тўрт марта спорт билан шуғулланишини таъкидлайди.
Номзод қабул қиладиган ягона дори мавсумий аллергияга қарши воситадир.
Шу билан бирга, маълумотномада Пенс шу вақтга қадар бошдан кечирган хасталикларга ҳам тўхталиб ўтилган.
Аввалроқ АҚШ президентлигига Республикачилар партиясидан номзод Дональд Трамп ҳам телекўрсатувлардан бирида шифокор маълумотномасини тақдим этган ва соғлиғи жуда мустаҳкам эканлигини таъкидлаган эди.
