Халқаро футбол уюшмаси ФИФА асли косоволик бўлган Гранит Жака, Жердан Шақири ҳамда Валон Бехрамига ўз ватани термасида ўйнаш учун рухсат бермади.
Бунга сабаб сифатида мазкур футболчиларнинг 13 май санасидан кейин ҳам бошқа термалар сафида майдонга тушгани кўрсатилган.
13 май куни Косово ФИФА аъзосига айланганди. Юқорида номлари келтирилган футболчилар эса Евро—2016 турнирида бошқа терма жамоа сафида майдонга тушган.
13 май санасидан кейин бошқа мамлакат термасида ўйнамаган олти нафар футболчининг Косово сафига қўшилишига ФИФА эътироз билдирмади. Улар орасида Норвегия сафида ўйинлар ўтказган Валон Бериши ҳам бор.
Косово ўзининг илк расмий учрашувини 5 сентябрь куни ЖЧ—2018 саралаши доирасида Финляндияга қарши ўтказиб, 1:1 ҳисобига имзо чекканди. Ўйинга бир неча дақиқа қолганида ФИФА Косовога қадар бошқа термада 13 майга қадар ўйнаган олти нафар футболчининг сўровига ижобий жавоб қайтарган.
Изоҳ (0)