10 та энг машҳур ядро полигонлари (фото)

«Коммерсантъ» дунёдаги ўнта энг машҳур ядро полигонлари ҳақида маълумот берди.

1.Атолл Бикини (Маршалл ороллари)

Ёпиқ полигон Тинч океанида, Ралик тизмасида жойлашган. Майдони — 6 квадрат километр. Биринчи марта АҚШ томонидан 1946 йил июлида «Чорраҳалар» операцияси чоғида ишлатилган. 1946—1958 йилларда Маршалл оролларида жами 67 та синов амалга оширилди. Айни пайтда фаолият юритмайди, аммо 1946 йилда эвакуация қилинган аҳоли радиациянинг юқори даражаси туфайли атоллга қайтиб бора олмайди.

2.Семипалатинск (Қозоғистон)

Полигон Шарқий Қозоғистон, Павлодар ва Караганда вилоятлари чегарасида жойлашиб, Курчатов шаҳрини эгаллаб олган. Майдони — 18,5 минг квадрат километр. 1949 йил 29 августда бу ерда биринчи совет атом бомбаси, 1953 йил 12 августда эса биринчи водород бомбаси портлатилган. 1991 йилда Қозоғистон президенти Нурсултон Назарбоев полигонни ёпди.

3.Невада (АҚШ)

Полигон Лас-Вегасдан 105 км узоқликда жойлашган ва 3,5 минг кв. м майдонни эгаллаган. 1951—1992 йилларда унинг ҳудудида 928 та ядро синовлари ўтказилган. Айни пайтда полигон ядро кратерлари билан тўла. Улардан бири — Седаннинг чуқурлиги 100 м, эни 390 метрга тенг.

4.Новая Земля (Россия)

Новая Земля архипелаги танланишига Шимолий Муз океанининг ушбу қисмида музламайдиган портларнинг борлиги ва оролларнинг аҳолиси камлиги сабаб бўлган. 1955—1990 йилларда полигонда 132 марта портлаш содир этилган. 1969 йилда энг йирик авария юз берди: радиоактив газ ва буғ оқими юзага сирқиб чиқиб кетди. 344 киши жабрланди.

5.Маралинга (Австралия)

Британия собиқ полигони Жанубий Австралия штатидаги чўлда жойлашган. Майдони — 3,3 минг кв км. 1956—1963 йилларда бу ерда 7 та атмосфера портлашлари содир этилган. 1967 йилда ёпилган.

6.Лобнор (Хитой)

Полигон Шинжон-Уйғур автоном туманидаги қуриб битган Лобнор кўли ўрнида жойлашган. Майдони — 2,4 минг кв. км. Биринчи синовлар 1964 йилда бўлиб ўтган, 1967 йилда эса бу ерда Хитойнинг биринчи водород бомбаси портлатилган. 1996 йил — Хитой ядро синовларини ҳар томонлама тақиқлаш тўғрисидаги шартномани имзолагунига қадар бу ерда 45 та синов ўтказилган.

7.Муруроа (Франция Полинезияси)

Франция собиқ полигони Тинч океанидаги Тиамоту архипелагида жойлашган, майдони — 15 кв. км. 1966—1996 йилларда Франция бу ерда 175 та синов ўтказди. Айни пайтда фаолият юритмайди.

8.Похран (Ҳиндистон)

Полигон Ражастхан штатидаги Тар чўлида жойлашган. 1974 йилда унинг ҳудудида биринчи синов ўтказилди, у Осиёда қуролланиш пойгасини бошлаб берди. Ядро қуроли борлигини мамлакат 1998 йилда тан олди, унгача полигонда яна бешта қурилма портлатилди. Сўнгги йилларда синовлар ҳақида хабар қилинмади.

9.Чагай (Покистон)

Синов полигони Рас Кох тизмаси ҳудудидаги Белужистон провинциясида жойлашган. 1998 йил 28 ва 30 май куни, Ҳиндистон билан муносабатлар кескинлашган пайтда, бу ерда илк синовлар ўтказилди. Сўнгги йилларда синовлар ҳақида хабар берилмаяпти.

10.Пунги-ри (Шимолий Корея)

Полигон Хамген-Пукто провинциясидаги Килху шаҳри яқинида жойлашган. Илк ядро синовлари 2006 йил 9 октябрда ўтказилган. Ядро синовлари 2009 ва 2013 йилларда ҳам олиб борилган. 2016 йил 6 январда Пунги-рида водород бомбаси портлатилди. Полигон фаол ҳисобланади.