АҚШ расмийлари 8 авиакомпанияга шу йил кузидан бошлаб Кубага доимий рейсларни амалга оширишга рухсат берди. Улар қаторида American Airlines, Delta Air Lines каби йирик тузилмалар бор. Бу ҳақда «ТАСС» хабар бермоқда.
JetBlue авиакомпанияси 31 августдан 29 октябргача ҳафтасига уч бор парвозларни амалга оширади, 1 ноябрдан бошлаб эса улар кунликка айланади. Шунингдек, 1 сентябрдан Silver Airways Санта-Клара билан авиақатновни йўлга қўяди. American Airlines самолётлари 7 сентябрдан Ольгин ва Сьенфуэгос, кейинчалик эса Камагуэй, Вилья-Клара ҳамда Матансас провинцияларига учади. Шундан сўнг икки давлат ўртасидаги ҳар кунги рейсларнинг умумий сони 11 тага етади.
Куба пойтахти Гаванага декабрь ойидан бошлаб Атланта, Нью-Йорк, Лос-Анжелес ва Хьюстон аэропортларидан учиш мумкин бўлади.
Эслатиб ўтамиз, олдинроқ JetBlue авиакомпанияси 31 август, чоршанба куни 55 йил мобайнида биринчи марта АҚШдан Кубага тижорий авиарейсни амалга оширгани ҳақида хабар берилганди.
Изоҳ (0)