Ангрен ва Лалмикор 28 август куни Ўзбекистоннинг энг салқин, Қўнғирот ва Жонгелди энг иссиқ аҳоли яшаш пунктлари бўлди

Ўзбекистонда 28 август, якшанба куни ҳаво ҳароратининг энг юқори кўрсаткичи +38 даражадан ошмади, дея хабар бермоқда «Ўзгидромет» (pdf).

Хабар беришларича, Ўзбекистон шаҳарлари ва қўрғонлари орасида энг юқори ҳарорати Қорақалпоғистоннинг Қўнғирот шаҳри ва Бухоро вилоятининг Жонгелди қўрғонида қайд этилган — +38 даража.

Тошкент вилоятидаги Ангрен шаҳри ва Жиззах вилоятидаги Лалмикор қўрғонида эса ҳаво ҳарорати +32 даражадан ошмаган ва шу куни улар Ўзбекистоннинг энг салқин аҳоли яшаш пунктларига айланган.

Ўзбекистон вилоят марказлари ва йирик шаҳарлари орасида энг салқин ҳаво Самарқанд ва Наманган шаҳарларида (+34 даража), энг юқори ҳарорат эса Қарши ва Термиз шаҳарларида (+37) қайд этилган.

Шу куни Урганч, Бухоро, Навоий, Андижон шаҳарларида ҳаво ҳароратининг энг юқори кўрсаткичи +35 даражани, Тошкент, Нукус, Жиззах, Гулистон, Фарғона шаҳарларида эса +36 даражани ташкил этган.

Ўзбекистоннинг тоғли ҳудудларида анъанавий салқин иқлим шароити сақланиб қолган — Қамчиқ довонида ҳаво ҳарорати +23 даражадан, Чимёнда эса +25 даражадан ошмаган.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.