Ватиканнинг олти нафар ўт ўчирувчиси ва олти жандарми 24 август куни Италия марказида юз берган зилзила оқибатларини бартараф этишда қатнашмоқда, деб ёзади «ТАСС» Ватикан радиосига таяниб. Ушбу хизматлар ходимлари папа Франциск буйруғига биноан юборилган.
Радио эфирида Ватикан ёнғин хизмати координатори аниқлик киритишича, унинг ходимлари италиялик ҳамкасблари билан бирга ишлаб, Риетидаги қутқарув-қидирув операцияси қўмондонлик марказига бўйсунмоқда.
У ватиканлик ўт ўчирувчилар 2009 йилда Абруццода содир бўлган зилзиладан сўнг ҳам Италияга кўмак берганини эслатди.
Зилзила Италия марказида маҳаллий вақт билан 03:36 да (Тошкент вақти билан 06:36 да) содир бўлди. 6,0 магнитудали ер силкиниши эпицентри Риети провинциясида 4 км чуқурликда жойлашган эди.
24–25 август кунлари Италияда мамлакат марказида рўй берган зилзила қурбонлари хотирасига миллий мотам эълон қилинди.
Изоҳ (0)