Россиянинг энг бой оилалари рейтинги эълон қилинди

Forbes нашри ҳар йили тузадиган Россиянинг энг бой оилалари рейтингида яна Гуцериевлар оиласи етакчилик қилди. Ушбу оиланинг давлати бир йилда икки ярим баробар, 9,8 миллиард долларгача ўсди.

БИН гуруҳи асосчиси миллиардер Михаил Гуцериев 40 га яқин амакивачча, холавачча, тоғавачча, аммаваччалари ва жиянлари борлигини тан олади. Аммо бизнесда ҳозирча фақат укаси — миллиардер Саит-Салам ва опасининг ўғли — миллиардер Микаил Шишхановнинг улуши бор.

Рейтингда иккинчи ўринни ўтган йилдаги каби Ротенберглар оиласи 2,8 миллиард долларлик умумий бойлиги билан эгаллади. Бир йил ичида «Стройгазмонтаж» компанияси асосчилари, ака-ука Аркадий ва Борис Ротенберг ва уларнинг ўғиллари Игорь ва Романнинг давлати 150 миллион долларга камайди.

Энг бой оилалар учлигига бу йил ака-ука Алексей ва Дмитрий Ананьевлар якун ясади. «Промсвязькапитал» компанияси эгаларининг умумий давлати 2,8 миллиард долларга баҳоланди.

Шунингдек, рейтингга ота-бола Шамаловлар, ака-ука Шаймиевлар (1,7 миллиард доллар), ака-ука Саркисовлар (1,4 миллиард доллар), ака-ука Бажаевлар (1,25 миллиард доллар), ака-ука Рахимкуловлар (1,2 миллиард долар), ака-ука Магомедовлар (1,15 миллиард доллар), шунингдек, ака-ука Муцоевлар (950 миллион доллар) кирди.