24 август куни ОАВларда Благовешченск шаҳрида Россия ҳалигача хитойлик шериклари билан бирга қурмоқчи бўлган, Амур дарёсидан ўтган темир йўл кўпригининг ўзига тегишли ярмини қуриб битирмагани ҳақида маълумот пайдо бўлди, деб ёзади TJournal. Хитой эса кўприкнинг ўзига тегишли қисмини битириб бўлган.
Амур дарёсини кесиб ўтувчи чала қурилган кўприк ҳақиқатда мавжуд, аммо у Благовешченск эмас, Яҳудийлар мухтор вилоятидаги Нижнеленинское қишлоғида жойлашган.
2014 йил августида Россия ва Хитой ўртасида Амур дарёсини кесиб ўтувчи кўприк қурилиши ҳақида битим имзоланган эди. Охир-оқибат, Хитой томони кўприкнинг ўзига тегишли ярмини қуриб битирди, у 1755 метр узунликда бўлиб, 17 та устунга таянган.
ОАВлар маълумотларига кўра, Россия кўприкнинг ўзига тегишли қисмини қуришга ҳамон киришгани йўқ, 2016 йил мартидагина у пудратчи қидиришни бошлади.
Россия президентининг Узоқ Шарқдаги сиёсий вакили Юрий Трутнев кўприк қурилишидаги узилишларга хитойлик шериклар сабабчи эканлиги, улар дастлаб лойиҳани тўлиқ ўзлари амалга оширишга рози бўлиб, сўнг қандайдир сабабга кўра ундан воз кечганини маълум қилди.
Шунга қарамай, Россия корпорациялари кўприк қурилиши яқин вақтлар ичида якунланишига умид билдирмоқда.
Изоҳ (0)