Тошкентнинг Мирзо Улуғбек шоҳ кўчасидаги пиёдалар ўтиш жойларига йўлни кўрсатувчи кўзгулар ўрнатилди. Бу ҳақда Facebook’даги «Водители Ташкента» гуруҳида фотохабар қолдирилган.
Фойдаланувчилардан бирининг қайд этишича, бу кўзгулар ҳам ҳайдовчилар, ҳам йўлни кесиб ўтаётган пиёдалар учун мўлжалланган. Гап шундаки, сўнгги вақтларда катта кўчаларнинг ўртасига ўрнатилаётган ажратувчи тўсиқлар баъзи ҳолларда пиёдага яқинлашиб келаётган автомобилни, ҳайдовчига эса йўлни кесиб ўтаётган пиёдани кўриш имконини бермайди.
Мирзо Улуғбек шоҳ кўчасидаги пиёдалар ўтиш жойига ўрнатилган кўзгу эса айнан шу камчиликни бартараф этишга ёрдам беради — кўзгу вазиятни «панорама» режимида кўрсата олгани сабаб, пиёданинг ҳам, ҳайдовчининг ҳам хавфсизлиги бир қадар ошади.
Аввалроқ Ўзбекистоннинг бошқа ҳудудларида ажратувчи тўсиқлар билан боғлиқ мазкур муаммонинг бошқачароқ ечими татбиқ этила бошланган эди — йўлни иккига ажратиб турувчи панжаранинг пиёдалар ўтиш жойига яқин қисми пиёда ва ҳайдовчиларга қулай тарзда пасайтирилади.
Мазкур ажратувчи тўсиқларни ўрнатишдан кўзланган асосий мақсад — пиёдалар дуч келган жойда йўлни кесиб ўтишини, шунингдек, ҳайдовчиларнинг қоидаларга хилоф равишда қарама-қарши қатнов қисмига ўтишини олдини олишдир. Бироқ баъзи пиёдалар учун бу чора етарли тўсиқ бўла олмаслигини кўриш мумкин:
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)