АҚШ президентлигига Республикачилар партиясидан номзод Дональд Трамп мамлакатдаги жорий сайловолди кампанияси бошидан буён биринчи марта қизиққонлик билан ўйламай гапириб юборишини ва бундан афсусланишини омма олдида тан олди. Бундай баёнот билан у Шимолий Каролина штатидаги Шарлотт шаҳрида чиқиш қилди, деб ёзади «ТАСС».
«Баъзан баҳс қизиганида бир вақтнинг ўзида кўплаб муаммоларга эътибор қаратиб, тўғри сўзни танлаб ололмайсан ёки нотўғри нарсани айтиб қўясан. Менда бундай ҳолат бўлган, — деди миллиардер. — Хоҳ ишонинг, хоҳ ишонманг, мен бундан афсусланаман. Айниқса, бу кимгадир қаттиқ тегиши мумкин бўлган ҳолатлардан афсусдаман».
Шу билан бирга у сайловчиларга юзланиб, уларга рост сўзлашга ваъда берди. Трамп, шунингдек, бундан кейин ўзини сиёсий боадаблик доираси билан чегаралаш ниятида эмаслигини қўшиб қўйди. «Биласизки, мен сиёсатчи эмасман, бу эса яхши, мен бизнес соҳасида ишлаб, ажойиб компания, кўплаб иш ўринлари яратдим, туманларни қайта тикладим, бу билан бутун умр шуғулландим», — деди республикачи.
Американинг CNN телекомпанияси ушбу сўзларни Трамп «узр сўрашни ўз ичига олмайдиган услубини бузди» деб баҳолади. «Трампнинг афсус билдириши у 14 ойдан буён олиб бораётган стратегиясидаги кескин бурилишдир», — дея таъкидлади CNN.
Изоҳ (0)