CNN телеканали бошловчиси Кейт Болдуин янгиликларнинг тўғридан-тўғри эфири чоғида авиазарба оқибатида жароҳат олган суриялик 5 ёшли Омран Дакниш ҳақида ҳикоя қила туриб, йиғлаб юборишига сал қолди. Бу ҳақда Tjournal хабар бермоқда.
Болакай бомбардимондан сўнг омон қолди ва тез тиббий ёрдам машинасига етказилди. Болдуин дунёнинг аксарият жойларида беш ёшли болалар яқинда мактабга бориши, Омран эса тирик қолиш учун ҳаракат қилишга мажбур эканлигини таассуф билан таъкидлади.
Шундан кейин у чуқур нафас олди ва Омран ҳақидаги ҳикояни давом эттирди.
«Биз бу авиазарба ортида ким турганини билмаймиз. У ва унинг оиласи тириклайин олиб чиқилди, аммо уйларидан фақат вайроналар қолди», — деди журналист.
Кейин телебошловчи яна бир марта тин олди ва репортажни қуйидаги сўзлар билан якунлади: «Бу Омран. У тирик. Биз шунчаки сиз бу ҳақда билишингизни истаймиз».
ОАВ Омранни Суриядаги уруш тимсоли деб атамоқда. The Telegraph мухбири Рафаэль Санчес томонидан олинган унинг сурати эса ижтимоий тармоқлар орқали тезда тарқалиб кетди.
Изоҳ (0)