Сурия армияси 9 августдан жануби-ғарбий Алеппога ҳужумга ўтди. Бу ҳақда Россия Қуролли кучлари Бош штаби бош тезкор бошқармаси бошлиғи Сергей Рудской маълум қилди, деб ёзади «РБК».
Унинг сўзларига кўра, Сурия қўшинлари «эришилган ютуқни ривожлантиришда» давом этмоқда. Рудской қўшимча қилишича, жангариларнинг бир нечта отрядлари Алеппони тарк этиб бўлди. У тўрт кеча-кундузда мингдан ортиқ жангарилар йўқ қилингани, икки мингга яқини эса яраланганини айтди.
«Еттита танк, саккизта жанговар машина, 29 та қурол-аслаҳа ва миномёт, 85 та йирик калибрли қуролли автомобиль йўқ қилинди», — дея қўшиб қўйди Рудской.
Унинг таъкидлашича, Алеппода шаҳар ичига гуманитар юк ортилган конвойлар кириши учун 11 августдан ҳар куни уч соатга жанговар ҳаракатлар, авиация ва артиллерия зарбалари тўхтатиб турилади.
Изоҳ (0)