Амалдаги тартибларга мувофиқ, Ўзбекистонда резидентларга 2000 АҚШ доллари эквивалентидаги нақд хорижий валюталарни йўловчи божхона декларациясида ёзма қайд этиш шарти билан эркин олиб чиқиб кетишига рухсат этилади. Шунга қарамасдан, амалдаги тартибларни қўпол равишда бузиб, нақд хорижий валюталарни ноқонуний равишда олиб чиқишга уриниш ҳолатлари ҳам учраб турибди, дея хабар бермоқда Тошкент шаҳар Божхона бошқармаси ахборот хизмати.

Яқинда Тошкент шаҳар божхона бошқармасининг «Келес» темир йўл чегара божхона пости ходимлари томонидан шу турдаги бир нечта қонунбузарлик ҳолатларининг олди олинди.

Жумладан, Тошкент—Москва йўналишидаги йўловчи поездини божхона назоратидан ўтказиш давомида божхоначилар томонидан бир нечта қонунбузар йўловчиларнинг қинғир қилмишларига нуқта қўйилди.

Масалан, йўловчилардан бири яшнободлик А.Йўлчиева (барча исм-шарифлар ўзгартирилган) шахсий кўрикдан ўтказилганда йўловчи божхона декларациясида кўрсатилмаган ва оғзаки сўровлар вақтида маълум қилинмаган 350 АҚШ доллари ва 350 еврони ички кийимлари орасига бекитганча олиб ўтишга урингани аниқланди.

Айни шу усулдан фойдаланиб К.Михайлова ҳам 748 АҚШ доллари, 100 евро ва 1500 Россия рублини олиб ўтишга уринган.

Тошкент—Новосибирск йўналишидаги поезд йўловчиси А.Йўлдашева ҳам божхоначиларнинг кўзини шамғалат қилишга уриниб, 1500 АҚШ доллари ва 3000 Россия рублини ички кийимларига яширганча олиб чиқишга уринган пайтда тўхтатиб қолинди.

Шу рейс бўйича ҳаракатланаётган яна бир фуқаро О.Кузнецованинг эса 6700 АҚШ долларини йўловчи божхона декларациясида кўрсатмасдан туриб, қўл юклари орасига яширганча олиб чиқмоқчи бўлганлиги фош қилинди.

Ҳозирда юқоридаги ҳолатлар юзасидан божхона текширувлари ва суриштирув ҳаракатлари давом эттирилмоқда.