Қозоғистонда ёқилғи қуйиш шохобчасининг портлаши оқибатида икки киши кучли куйиш жароҳатини олди

Қозоғистоннинг Оқсой шаҳрида автомобилларга ёқилғи қуйиш шохобчаси портлади. Натижада икки киши жабрланди, деб хабар бермоқда «Nur.kz».

«4 август куни маҳаллий вақт билан 15:45 да Ғарбий Қозоғистон вилояти Оқсой шаҳридаги ‘Алау газ’ газ қуйиш шохобчасида 10 кубометрлик иккита газ аралашмаси (пропан) захира идиши портлади ва 25 квадрат метр майдондаги оператор хонаси ёнди.

Ёнғинни ўчириш 16:20 да бошланди ва 16:34 да бартараф этилди. Воқеа жойидан куйиш жароҳатлари билан Бурлинский тумани Марказий шифохонасига оператор ва ҳайдовчи ётқизилди. Ёнғинни ўчириш учун 14 киши ва 4 та техника жалб этилди», – деб маълум қилди мамлакат ИИВнинг фавқулодда вазиятлар қўмитаси расмий вакили Руслан Иманкулов.

Жароҳат олганлардан бирининг танаси 55 фоиз, иккинчисиники 95 фоиз куйган.