Американинг Facebook компанияси АҚШда солиқ тўламаслик учун ўз активлари нархини пасайтириб кўрсатгани туфайли, 3 миллиарддан 5 миллиард долларгача жаримага тортилиши мумкин, дея хабар бермоқда «ТАСС» CNN телекомпаниясига таяниб.
CNN Facebook 28 июль куни АҚШнинг Қимматли қоғозлар ва биржалар бўйича комиссиясига кўриб чиқиш учун юборган ҳужжатларга асосланди.
Материалларга кўра, компания айбдор деб топилган тақдирда, жарима унинг молиявий ҳолатига «салбий таъсир ўтказиши»ни тан олди. «Биз Ички даромадлар хизмати (АҚШ солиқ хизмати) позициясига қаршимиз ва унинг билдиришномасидан норози бўлиб, АҚШ Солиқ судига шикоят аризаси берамиз», — дея иқтибос келтирди CNN ҳужжатлардан.
Аввалроқ АҚШ Адлия вазирлиги Facebook’дан мазкур компаниянинг мамлакатда солиқ тўлашдан бўйин товлаши юзасидан олиб борилаётган текширув ўтказаётган Ички даромадлар хизмати билан ҳамкорлик қилишини талаб этган эди. АҚШ Ички даромадлар хизмати (ИДХ) Ernst & Young аудиторлик компаниясини солиқ тўлашдан қочиш ишида шерикликда айблади. Компания Facebook активларини баҳолаш учун ваколатли бўлган ва уларнинг қийматини «миллиардлаб доллар»га пасайтирган. ИДХ ўзининг гумонларини тасдиқлаш ёки рад этиш учун Facebook’дан молиявий ҳужжатларни олишга бир неча бор уринди. Хизмат вакили Нина Ву Стоуннинг билдиришича, июнь ойининг ўзида олтита шундай сўров жўнатилган, бироқ Марк Цукерберг етакчилигидаги компания уларга бўйсунмаган. Шундан сўнг мазкур ишга АҚШ Адлия вазирлиги аралашди.
Изоҳ (0)