Допинг маш-машасидан ҳоли бўлган россиялик тоза спортчилар Рио-де-Жанейро Олимпиадасига қўйилмаса, эркин кураш бўйича собиқ спортчи, 1988 ва 1992 йилги олимпия ўйинлари ғолиби, Россия Кураш Федерациясининг биринчи вице-президенти Арсен Фадзаев Олимпиададан олган иккита олтин медалини Халқаро Олимпия Қўмитасига қайтариб беради.
«ТАСС» хабарига кўра, Фадзаев бу ҳақда Халқаро Олимпия Қўмитаси президенти Томас Бах билан очиқ мулоқот вақтида айтиб ўтган.
«Сизни хабардор қилиб қўймоқчиман, агарда ақл билан иш юритилмаса мен сизга Олимпиада ўйинларида қўлга киритганим 2 та олтин медални қайтариб бераман. 1984 йилги Лос-Анжелес Олимпиадасига бизни айнан сиёсатчилар сабаб қўйишмаганди. Агар менинг ёш шогирдларим ҳалол кураш орқали Олимпиада ўйинлари чемпионига айланиш ҳуқуқидан маҳрум этилса, мен ўзимни олимпия ўйинлари чемпиони деб атай олмайман», — дейди Арсен Фадзаев.
«Олимпиада ўйинларида тоза ҳалол спортчиларнинг иштирок этмаслиги — мусобақа ғояларининг ўлганини билдиради. Олимпиада ўйинларида иштирок этиш ҳар бир спортчининг мақсади, унда ғолиб чиқиш эса уларнинг орзуси эканини сиз жуда яхши биласиз. Тасаввур қилинг, сизни спорт принсипларига зид бўлган қандайдир қарорлар сабаб Олимпиада ўйинларидан четлатишди, бу сизга қандай таъсир қиларди? Ишонаманки, бундай пайтда сиз Халқаро Олимпия Қўмитаси президенти бўлишни истамасдингиз», — деб мурожаат қилган собиқ курашчи.
Олти карра жаҳон ва 4 карра Европа чемпиони бўлган Арсен Фадзаев Халқаро Олимпия Қўмитасининг допинг билан қўлга тушган спортчиларга қарши қаттиқ курашини қўллаб-қувватлашини билдириб, унинг курашчилари бундай иллатдан четда эканини қистириб ўтди.
«Олимпиадада дунёнинг энг кучли спортчилари қатнаша олмас экан, яхшиси бундай турнирни ўтказмай қўя қолган маъқул деб ҳисоблаганман ва шундай бўлиб қолади. Вақти келиб спортчиларнинг орзусига болта урилганига қандай жавоб бера оласиз?» — деди Фадзаев.
«Мен болалигимдан Олимпиада ўйинлари чемпиони бўлишни истадим ва бу йўлда меҳнат қилдим. 1984 йилга қадар бўлган барча турнирларни ютдим, рақибларимга ҳеч бир жабҳада имкониятни бой бермадим. Бироқ кутилмаган фожеа сабаб сиёсатчилар Олимпиадага бойкот эълон қилди, кўп спортчилар унда иштирок эта олмади. Шу тариқа сиёсатчиларнинг жирканч қўллари сабаб бир қатор спортчилар «синиб» қолди», — деб сўзларига якун ясади Олимпиаданинг икки карра чемпиони.
Изоҳ (0)