21 июль, пайшанба куни Италиянинг жанубий соҳилларини шимолий Африка қирғоқларидан ажратиб турувчи Сицилия бўғозидан ўтиб олишга уриниш чоғида қирқ нафарга яқин муҳожир ҳалок бўлди. Бу ҳақда ANSA агентлиги маълумотига таяниб, «ТАСС» хабар бермоқда.
Ҳалокатга учраган қайиқдан 452 нафар муҳожирни қутқариш бўйича операция давомида унинг трюми (кеманинг механизмлар ўрнатиладиган ва юк ортиладиган остки қисми)дан 17 нафар қурбоннинг жасади топилган.
Шу тариқа аввалроқ «Чегара билмас шифокорлар» кемаларидан бири экипажи томонидан топилган 22 кишининг жасади билан бирга жами ҳалок бўлган муҳожирларнинг сони 39 кишига етди.
Трюмдаги одамлар мотор чиқарадиган ис газидан заҳарланиб ўлганлиги тахмин қилинмоқда.
Италия соҳил қўриқлаш хизматининг маълумотига қараганда, 21 июль, пайшанба куни амалга оширилган саккизта операция давомида жами 1 128 нафар муҳожир қутқариб қолинган.