Малайзия, Хитой ва Австралия транспорт вазирлари Путражаеда (Малайзия) 22 июль, жума куни 2014 йил мартида ғойиб бўлган Малайзиянинг Boeing (MH370) самолётини Ҳинд океанида қидириш якунларини муҳокама қилади. Бу ҳақда Австралия инфраструктуравий ривожланиш ва транспорт вазири Даррен Честер маълум қилди, дея хабар беради «ТАСС».
«Бўлажак учрашув эришилган натижаларни баҳолаш ва Австралия ғарбидаги умумий майдони 120 минг квадрат километр ҳудуддаги қидириш ишлари якунланиши сари қабул қилишимиз мумкин бўлган чораларни муҳокама этиш имкониятини беради. 2015 йил апрелида Австралия, Малайзия ва Хитой ҳукуматлари авиалайнер қаерга қулаганига ойдинлик киритадиган янги маълумот бўлмаган тақдирда қидирув ҳудуди майдони кенгайтирилмаслиги ҳақида келишиб олган», — дея таъкидлади вазир.
Австралия транспортда хавфсизлик бюросининг билдиришича, ҳозиргача қидириш олиб борилаётган 120 минг квадрат километрдан 110 мингдан ошиғи текшириб бўлинган. Дастлаб бу ишни июль—август ойларида якунлаш режалаштирилган, бироқ мазкур ҳудуддаги пўртанали об-ҳаво ушбу муддат сурилишини тақозо этмоқда.
Изоҳ (0)