Ўзбекистон аҳолиси 32 млн кишига яқинлашди

Ўзбекистоннинг доимий аҳолиси миқдори 1 июль ҳолатига кўра 31,807 миллион кишини ташкил этди. Йил бошидан бери ўсиш 231,7 минг киши ёки 0,7 фоизга тенг бўлди. Бу ҳақда, Давлат статистика қўмитаси маълумотларига асосланиб, «Газета.uz» хабар бермоқда.

Шаҳар аҳолиси 16,11 миллион кишига (умумий аҳолининг 50,6 фоизи), қишлоқ аҳолиси 15,697 миллион кишига (49,4 фоиз) тенглашди.

Январь–июнь ойларида мамлакатда 318 минг бола дунёга келди, туғилиш коэффициенти 20,2 промиллени ташкил этди.

Ўлим ҳолатлари ярим йилликда 73,9 мингни, ўлим коэффициенти эса 4,7 промиллени ташкил этди. Қайд қилинган ўлим ҳолатларининг 59,7 фоизи қон айланиш тизими хасталиклари, 8,6 фоизи ўсимталар, 5,5 фоизи ҳазм қилиш органлари хасталиклари, 6,3 фоизи нафас олиш органлари хасталиклари, 5,6 фоизи бахтсиз ҳодисалар, заҳарланиш ва жароҳатлар туфайли келиб чиққан.

Ҳисобот даврида бир ёшга тўлмаган 3700 бола ўлими қайд этилди, болалар ўлими коэффициенти 10 промиллени ташкил этди. Бу болаларнинг 53,5 фоизи перинатал босқичдаги ҳолатлар туфайли, 24,4 фоизи нафас олиш органлари хасталиклари, 10,2 фоизи туғма нуқсонлар, 3 фоизи эса инфекцион ва паразитар хасталиклар туфайли оламдан ўтди.

Шунингдек, бу вақт ичида ФҲДЁ органларида 92,4 минг никоҳ ва 14,8 минг ажрашиш қайд этилди. Никоҳ коэффициенти 5,9 промиллени, ажрашиш коэффициенти эса 0,9 промиллени ташкил этди.

Январь–июнь ойларида республикага келганлар сони 72 минг кишини, мамлакатдан чиқиб кетганлар сони 84,4 минг кишини ташкил этди. Миграция сальдоси — минус 12,4 минг.