Тошкентдаги Инҳа университети ректори Шерзод Шерматов ва Huawei компанияси бош директори Ван Пэн 20 июль, чоршанба куни ҳамкорлик тўғрисидаги меморандумни имзолади. Ҳужжат Ўзбекистондаги иқтидорли ёшларни қўллаб-қувватлаш ва мамлакатда ахборот-коммуникация технологияларини ривожлантиришга қаратилган. Бу ҳақда Ictnews хабар бермоқда.
Ахборот-коммуникация технологиялари соҳасида дунёдаги етакчи компаниялардан бўлган Huawei мазкур меморандум доирасида ҳар йили университет бакалавриатининг беш нафар истеъдодли талабасига тўрт академик йил давомида грантлар тақдим этиб боради. Шунингдек, талабалар учун махсус IT-курслар ташкил этиш ҳам режалаштирилмоқда. Машғулотлар ўташ учун дунёдаги етакчи олий ўқув юртлари профессорлари ва компания мутахассислари жалб этилади.
Талабаларнинг Startup лойиҳаларини қўллаб-қувватлаш ҳамкорликнинг яна бир муҳим йўналиши бўлади. Huawei талабалар махсус лойиҳалар, дастурий таъминот ва қарорларни ишлаб чиқишига кўмак беришга қизиқиш билдирди. Келгусида уларни нафақат Ўзбекистон, балки глобал бозорда ҳам фойдаланиш мўлжалланмоқда.
Томонлар университет биносида IT-лабораториялар яратиш имкониятини ҳам кўриб чиқади. Бу ерда талабалар Huawei компаниясининг турли жиҳозларидан фойдаланишнинг амалий кўникмаларини эгаллаши мумкин бўлади.
Изоҳ (0)