Туркия президенти Ражаб Тоййиб Эрдўғон CNN телеканали эфирида агар Мармарис шаҳридаги меҳмонхонада яна 10—15 дақиқага ушланиб қолганида, ҳарбий тўнтариш вақтида уни ўлдирган бўлишларини айтди, деб ёзади «Газета.ru».
«Мармарисда менга қарши операция ўтказилаётганди. Менинг икки соқчимни ўлдиришди. Агар яна 10—15 дақиқага ушланиб қолганимда, мен ҳам ўлдиришган ёки асирга олишган бўларди», — деди Эрдўғон.
Туркия етакчиси маълум қилишича, у Мармарисда оиласи билан дам олаётган бўлган.
«Ўн бешинчи санада мен Мармарисда эдим, бизда беш кунлик таътил эди. Тахминан кечки ўнда менга янгиликни айтишди, нима бўлаётганидан хабардор қилишди.
Шунингдек, Эрдўғон ҳодиса ҳақида хабар топгач, миллатга FaceTime дастури ёрдамида телевидение орқали мурожаат қилишга мажбур бўлганини айтди.
Нашр эслатишича, Ражаб Тоййиб Эрдўғон Мармарис курорт шаҳридаги меҳмонхонани тарк этгач, ярим соатдан кейин у ерга давлат тўнтариши тарафдорлари бўлган ҳарбийлар етиб келган эди.
16 июлга ўтар кечаси Туркияда исёнчилар гуруҳи ҳарбий тўнтаришни амалга оширишга уринди. Асосий қўзғолонлар Истанбул ва Анқарада бўлиб ўтди. Мамлакат раҳбарияти фитна даф қилинганини эълон қилди. Сўнгги маълумотларга кўра, 208 нафар фуқаро ҳалок бўлди, 100 нафар исёнчи ўлдирилди, 1,5 мингга яқин киши эса яраланди.
Изоҳ (0)