Евро—2016 ярим финалида Уэльс дарвозасини ишғол қилган португалиялик Криштиану Роналду кун қаҳрамонига айланиб кетди. Унинг тўпга зарба бериш учун ердан қанча масофага кўтарилгани борасида Европа нашрлари бирин-кетин ўз таҳминини чоп эта бошлади.
«Championat.asia»нинг Pasion Futbol нашрига асосланиб хабар беришича, Роналду бош билан зарба бериш учун 2,88 метрга парвоз қилган. Бунда манбаа Уэльс ҳимоячиси Жеймс Коллинзнинг бўйига асосланиб, шундан келиб чиққани ҳолда Роналдунинг сакрашини аниқлашга ҳаракат қилган.
Кейинроқ La Gazzetta dello Sport ва Marca нашрлари ҳам бу борада ўз таҳминий ўлчовини чоп қилди. Уларнинг биринчиси 2,44 метр баландликни кўрсатган бўлса, бошқаси 2,61 метр фикрини илгари сурган.
Уэльс дарвозасига урилган гол Криштиану Роналду учун Европа Чемпионатлари тарихидаги тўққизинчиси бўлиб, ҳужумчи франциялик Мишель Платинининг рекордини такрорлади. Платини 1984-йилги Европа чемпионатида бир йўла 9 та гол урганди, Роналду эса бунинг учун 4 та Еврода иштирок этди ва 4 та қитъа чемпионатида гол урган ягона футболчига айланиб олди.
Изоҳ (0)