Тез орада барпо этиладиган 10 та ҳайратланарли бино (фото)

AdMe айни пайтда барпо этилаётган ва бизни аста-секинлик билан янги даврга олиб борадиган бинолар лойиҳалари билан таништирди.

«Лахта-центр», Санкт-Петербург

Фин бўғози қирғоғидаги 87 қаватли осмонўпар бино «Газпром нефть» расмий бош қароргоҳига айланади. У Европадаги энг баланд бино бўлиши кутилмоқда.

Dubai Towers — The Lagoons

Бирлашган Араб Амирликларининг Дубай шаҳрида жойлашадиган улкан мажмуа ўз ичига сув йўллари, портлар, ҳайратланарли манзаралар ва янги осмонўпар биноларни олади.

Тангачасимон минора, Чжухай (Хитой)

Чжухай шаҳридаги иккита дарё кесишган нуқтада 100 метрли томоша майдони қурилади. Сал буралган миноранинг кўриниши балиқ танасини эслатади, у тангачаларга ўхшаш тешик-тешик алюминий билан қопланган.

«Рақс тушаётган аждарлар», Сеул

Сеулнинг Ёнсан даҳасида қад кўтарадиган мажмуа 88 ва 77 қаватли иккита минорадан иборат, улар ташқи томондан аждар терисига ўхшатиб безатилади.

Бепоён шаҳар, Лондон

Ушбу осмонўпар бино қаватлари ўзига хос пандуслар ёрдамида ҳосил бўлади. Асосийси, у ерда жуда кўп яшил ҳудудлар ва боғлар мавжуд бўлади.

Чексиз уй, Сидней

Қимматбаҳо ресторанлари бўлган янги «Инфинити» деб номланувчи серҳашам уй Сиднейда қад кўтаради.

Европа спирали, Брюссель

Ушбу лойиҳанинг номи ва у Брюссель учун мўлжаллангани рамзий маънога эга, ахир айнан шу шаҳарда Евроиттифоқ бош қароргоҳи жойлашган. Лойиҳа Европа ҳамдўстлиги мамлакатларининг алоқаси ва маданий қадриятларини намойиш қилишга қаратилган.

City of Dreams меҳмонхона мажмуаси, Макао (Хитой)

Янги 40 қаватли беш юлдузли меҳмонхона меъморчилик дунёсининг афсонаси — Заха Ҳадиднинг лойиҳаси ҳисобланади, шунинг ўзигина у дунёдаги энг ғаройиб  бинолардан бири бўлишидан дарак беради.

«Лава» бионик минораси, Абу-Даби

Ушбу осмонўпар бино конструкцияси нафақат меъморлар, балки биологлар томонидан ҳам ишлаб чиқилган: улар ҳамкорликда дарахтларнинг ўсиши тамойили ва уларнинг ҳимоя механизмларига асосланди.

Бионик шаҳар, Шанхай

15 йилдан сўнг Хитойда 100 минг киши яшаши учун мўлжалланган минора шаҳар қурилади. Бионик архитектура қонунларига кўра яратиладиган иншоот ёнғин, сув тошқини, зилзила ва бўронга қарши тура олади.