Суриядаги фуқаролик урушидан қочиб Туркияга ўтган қочқинлар мамлакат фуқаролигини олиши мумкин. Бу ҳақда аҳолиси муҳожирлар ҳисобига икки баробар ортган Килис шаҳридаги чиқиши чоғида президент Ражаб Тоййиб Эрдўғон маълум қилди, деб хабар беради «РБК».
«Бу ерда бўлиб турган биродарлар ва сингилларимиз орасида Туркия фуқаролигини олиш истагидагилар бор. Ички ишлар вазирлиги бу борада тегишли ишларни амалга оширмоқда. Туркия — сизнинг ҳам уйингиз», — таъкидлади Эрдўғон.
Юқори мартабали турк мансабдорларидан бири президентнинг сўзларига «ниятлар ҳақидаги баёнот» деб изоҳ берди.
Эрдўғон Суриядаги вазиятни танқид остига олди. Унинг айтишича, «сиёсати 600 минг кишининг ўлимига олиб келган шахсни раҳбар сифатида тасаввур этиб бўлмайди. Мавжуд тузум мамлакатни бошқариш лаёқатини йўқотди, Сурия халқи эса қарорларни қабул қилишга таъсир этиш имкониятига эга эмас».
Туркияда айни пайтда 2,7 миллион қочқин истиқомат қилаётгани қайд этилган. Шунингдек, юз минглаб ноқонуний яшаётган ва ишлаётган муҳожирлар ҳам бор. Мухолифатга кўра, Эрдўғоннинг қарори ҳукмрон партияга 3 миллионгача янги овозларни олиб келиши ва 2019 йилги сайловлар натижасини ўзгартириб юбориши мумкин.
Изоҳ (0)