Forbes журналининг маълумотларига кўра, Криштиану Роналду 2016 йилнинг энг қиммат футболчиси деб топилди. Шу муносабат билан «Stadion.uz» футболчининг даромад манбалари ва йирик харажатлари рўйхатини тақдим этди.
Сўнгги 12 ой ичида Роналду 88 миллион доллар даромад кўриб, энг қиммат футболчилар етакчисига айланди.
Бу даромаднинг 32 миллион долларлик қисми Tag Heuer ва Nike фирмалари билан тузилган шартномалардан тушди.
Nike компанияси Роналдуга 13 миллион доллар гонорар берди.
Шунингдек, Роналду Herbalife, Castrol, Samsung ва KFC фирмалари билан ҳам ҳамкорлик қилади.
Бироқ Роналдунинг энг йирик даромад манбаи «Реал» футбол клуби бўлиб, унга 50 миллион доллардан кўпроқ ҳақ тўланади.
Агар футболчи муддатдан аввал қироллик клубини тарк этадиган бўлса, у «Реал»га 1 миллиард доллар тўлашга мажбур бўлади.
Хўш, Роналду бу пулларни қаерга сарфлайди?
Унинг энг катта харажатталаб қизиқишларидан бири машиналардир. У 300 минг долларлик Lamborghini Aventador уловида юради. Бундан ташқари, Maserati, Bentley, Porsche ва Mercedes машиналарига эга.
2009 йилда у 315 минг долларлик Ferrari’ни уриб олган эди.
Кейинги харажатлардан бири унинг уйидир. Роналду Мадриднинг Ла Финка номли бой маҳалласида яшайди. Унинг уйи 7,1 миллион долларга баҳоланади.
Бу ҳали ҳаммаси эмас.
2015 йилда у Нью-Йоркнинг Trump Tower осмонўпар биносидан 18,5 миллион долларга уй сотиб олди.
Роналду Jacob and Cо компаниясининг 160 минг долларлик соатини тақиб юради.
Роналду ўзининг мумдан ишланган ҳайкалига 29 минг доллар сарфлади ва «Роналду–2»ни уйининг йўлагига ўрнатди.
Шунингдек, у номдор дизайнерларда кийинишга одатланган. Роналду Armani фирмасининг юзи ҳисобланади.
Роналду эркаклар ички кийимларини ишлаб чиқариш билан ҳам шуғулланади.
Футболчининг айтишича, унинг ҳасадгўйлари ҳам кўп. У буни «Менинг пулим кўп, иқтидорлиман, кўп нарсага эришдим. Мен ҳақимдаги ёмон фикрлар ҳасаддан бошқа нарса эмас» деб изоҳлайди.
Роналду меҳрибон ва кўнгилчан. У «Олтин тўп» топшириш маросимида йиғлаб юборганди.
Шунингдек, у Португалиянинг онкологик касалликлар марказига 165 минг доллар хайрия қилди ва 10 ёшли фанатининг мия қисмидаги онкологик операцияси учун 38 минг доллар ажратди.
Изоҳ (0)