Ўзбекистонда хизмат кўрсатган артист, бугунгача хит бўлиб келаётган тароналар муаллифи Руслан Шариповнинг суратлари интернетда кенг муҳокамага сабаб бўлди. Вазиятга ойдинлик киритиш учун «Даракчи.uz» унинг хонадонига йўл олди ва онаси Лола опа билан суҳбатда бўлди.
— Айтингчи, бугунги кунда ўғлингиз нималар билан банд?— Ҳозир тоққа кетган, умуман олганда эса ҳеч нарса билан банд эмас.
— Ўз вақтида ўзбек эстрадасининг чўққиларини забт этган Руслан Шариповнинг ҳаётида нима бўлдики, у ҳаммасидан воз кечиб, бугунги аҳволга тушди?
— Оилавий сабаблар ҳам бўлди... Лекин барибир инсон тақдири учун ўзи масъул бўлиши керак, шу сабабдан ҳаммасига барибир ўзи айбдор деб ўйлайман.
— Қандай оилавий сабаблар уни ҳамма нарсадан воз кечишига олиб келди?
— Руслан турмуш ўртоғини жуда қаттиқ севарди, ҳозир ҳам севади... Унинг яхши яшаши учун ҳамма шароитларни яратиб берди. Қўша-қўша машиналар, уй юмушларини бажарадиган хизматчилардан тортиб, болаларига қарайдиган энагагача ёллади. Тўқликка шўхлик бўлдими, хотини Русланга бошқасини севиб қолганини ва унга турмушга чиқишини айтди. Назаримда, Русланда ҳаётга бўлган жуда катта қизиқиш ва иштиёқ ўша онда сўнди.
— Ўғлингизнинг тарқалган суратларини кўрдингизми?
— Йўқ, агар бўлса кўрсатинг.
(Суратларга назар солгач...)
— Ҳа, бугун у мана шундай инсонга айланган.
— Ушбу суратлар ҳаммани ларзага солди. Отаси қандай инсон бўлган?
— У ҳам ўз соҳасини жуда истеъдодли соҳиби бўлган. Бироқ у ҳам жуда кўнгли бўш одам эди. Руслан ҳам шундай, бошига тушган барча нарсага ҳам унинг мана шу характери сабаб. Кучли эмас, ҳаёт синовларига таслим бўладиган, курашувчанлик қобилияти йўқ инсон.
— Унинг суратларини кўриб, санъаткорлардан бирортаси келдими?
— Ҳеч ким келмади. На Иззат Иброҳимов, на Рашид Холиқов ва на Тоҳир Содиқов, бирортаси келмади.
— Бугун у ишламаётган бўлса яшаш учун пулни қаердан оляпти?
— Уйини сотган. Ҳозир мен билан яшаяпти.
— У ҳамма нарсасини йўқотаётгани, ҳаёти тубанликка тушиб бораётганини англаяптими?
— Эҳтимол, лекин билдирмайди. У «агар истасам эртагаёқ аввалгидан-да зўр бўлиб кетишим мумкин», дейди.
— Уни ичкилик балосидан даволаш ҳақида ўйлаб кўрмадингларми?—Мен учун асосийси у соғ бўлгани ва ичмагани. Бошқа нарса керакмас. Албатта, даволаш ниятидаман, унинг аввалги ҳолига қайтишига ишонаман.
Изоҳ (0)