Япониянинг Окинава префектураси 600 килограмм атрофидаги наркотик стимуляторлар туркумини мусодара қилди. «Киодо» агентлигига кўра, бу ҳуқуқ-тартибот идоралари томонидан қўлга киритилган мамлакат тарихидаги энг йирик миқдордаги наркотиклар туркумидир, дея хабар беради «ТАСС».
Гиёҳванд моддалар туркумининг қора бозордаги нархи 42 миллиард иенани (387 миллион доллар) ташкил этиши билдирилмоқда. Наркотиклар Окинава маъмурий маркази Наха шаҳри портида бўлган яхта ичидан топилди. Шундан сўнг префектура полицияси тайванлик олти фуқарони ушбу тақиқланган моддалар контрабандасида гумон қилиб, қўлга олди.
Японияда олдинги рекорд даражадаги наркотиклар туркуми (564 килограмм) 1999 йили Кагосима префектурасида мусодара этилганди.
Изоҳ (0)