Ўзбекистон миллий терма жамоасининг ЖЧ—2018 3-саралаш босқичидаги рақиби — Жанубий Корея термаси ўртоқлик ўйинида Испаниядан йирик ҳисобда енгилди. Европанинг амалдаги чемпиони Осиё вице-чемпиони дарвозасига олтита гол уриб, ўз дарвозасидан 1 та гол ўтказиб юборди.
Швейцариядаги «Red Bull Arena» стадиони мезбонлик қилган беллашувда ҳар икки терма жамоа мураббийлари 17 нафардан футболчини синовдан ўтказди.
Испания терма жамоаси сафида Англияда тўп сурадиган футболчилар — Давид Силва ва Сеск Фабрегас 1 тадан, Италия А сериясида ҳаракат қиладиган Алваро Мората 2 та, шунингдек, Ла Лига иштирокчиси Нолито 2 та гол уришга муваффақ бўлди. Кореяликлар сафида эса «Сеул» футбол клуби аъзоси ўз номига гол ёзиб қўйди.
Қайд этиш керак, Испания терма жамоаси Евро—2016 мусобақасига тайёргарлик кўрмоқда. Висенте Дел Боске жамоаси турнирнинг «D» гуруҳида Хорватия, Чехия ва Туркия термаларига қарши кураш олиб боради.
ЖЧ—2018 йўлида Эрон, Қатар, Хитой, Сурия ва Ўзбекистон терма жамоаларига рақиб бўладиган Жанубий Корея 5 июнь куни Чехияга қарши саф тортади. Евро—2016 иштирокчисига қарши беллашув Прага шаҳрида бўлиб ўтади.
Жанубий Кореяга қарши шу йилнинг 16 сентябрь ва 2017 йилнинг 5 сентябрь куни расмий ўйин ўтказадиган Ўзбекистон терма жамоаси бугун — 2 июнь санасида Олий Лигада тўп сураётган легионер футболчилар термасига қарши майдонга тушади. Бунга сабаб сифатида аввалига Қирғизистон, кейин эса Экваториал Гвинея терма жамоаларига қарши учрашувлар бекор қилингани, ундан аввалроқ эса Таиланддаги «Қирол Кубоги» мусобақаси четга суриб қўйилганини кўрсатиш мумкин.
Халқаро ўртоқлик учрашуви
Испания — Жанубий Корея 6:1
Голлар: Давид Силва, 30 (1:0). Сеск Фабрегас, 32 (2:0). Нолито, 38 (3:0). Альваро Мората, 50 (4:0). Нолито, 54 (5:0). Чжу Се Чжон, 83 (5:1). Альваро Мората, 89 (6:1).Испания: Икер Касиляс (Серхио Рико, 74), Марк Бартра, Сесар Аспиликуэта (Хорди Альба, 46), Эктор Бельерин, Жерар Пике (Ариц Адурис, 59), Андрес Иньеста (Тиаго Алькантара, 46), Бруно Сориано, Давид Силва (Педро, 46), Сеск Фабрегас (Серхио Бускец, 46), Нолито, Альваро Мората.
Жанубий Корея: Ким Чжин Хен, Хон Чжон Хо, Юн Сук Ен (Лим Чхан Ву, 81), Чжан Хен Су (Ли Ён, 70), Ким Ки Хи (Квак Тхе Хви, 61), Ан Гук Ён (Чжу Се Чжон, 61), Ки Сон Ён, Нам Тхе Хи, Сон Хин Мин (Ли Чже Сон, 61), Хван Ий Чжо (Хен Чжун Сук, 46), Чжи Дон Вон.
Изоҳ (0)