Мадриднинг «Реал» жамоаси ҳужумчиси Карим Бензема ўз ватанида бўлиб ўтадиган Европа чемпионатида Франция терма жамоаси таркибига киритилмагани ҳаётидаги энг ачинарли ҳолат эканини айтди, деб хабар бермоқда «ТАСС».
«Чемпионат» Франция терма жамоасининг 10 июндан 10 июлига қадар бўлиб ўтадиан Евро–2016 турнирида иштирок этадиган футболчилар рўйхатини эълон қилди. 28 ёшли футболчи қайдномага киритилмади.
«Франция терма жамоасининг 2010 йилги жаҳон чемпионати таркибига киритилмаганимда шокка тушган эдим, аммо ўз уйингда бўлиб ўтадиган Европа чемпионатини ўтказиб юбориш янада қийин бўлади. Бу ҳаётимдаги энг ачинарли ҳолат. Мен ‘Реал’ сафида ўйин амалиётига эга бўлдим, клуб билан Европа Чемпионлар Лигасида зафар қучдим. Агар ёмон футболчи бўлганимда, совринлар юта олмасдим», – деди Бензема.
Франция терма жамоаси сафида илк ўйинини 2007 йилда ўтказган Бензема бугунги кунга қадар 81 учрашувда майдонга тушиб, 27 та гол киритишга муваффақ бўлган.
Эслатиб ўтамиз, Франция футбол федерацияси Матье Вальбуэнани шантаж қилиш иши бўйича 2015 йил декабрида Бенземани терма жамоадан вақтинча четлатганди. Кейинчалик Франция суди Бенземадан Вальбуэна билан мулоқот қилиш бўйича тақиқни олиб ташлади ва терма жамоа сафида тўп суришига рухсат берди. Аммо Франция футбол федерацияси президенти Ноэль Ле Гре футболчининг терма жамоага қайтарилмаслигини билдирган эди.