Томск давлат университети олимларининг халқаро гуруҳи АҚШлик ва мексикалик ҳамкасблари билан ҳамкорликда кўршапалаклар ва уларнинг паразитларини ўрганиб чиқди, деб ёзади «ТАСС». Олимлар қўлқанотлилар одамга хавфли касалликларни кемирувчилар орқали юқтиришини исботлади.
Улар кўршапалакларда кемирувчиларга хос гамазид (каламушга оид) каналарни аниқлади. Шу тариқа, каналар касаллик уйғотувчиларни кўршапалакдан кемирувчиларга, улар эса — одамга юқтиради. Бундан ташқари, инфекция одамга кўршапалакдан чивин орқали ҳам ўтиши мумкин.
Бунгача қўлқанотлилар бошқа умуртқалилардан маълум даражада изоляцияланган ва инфекция тарқатувчи сифатида хавфли эмас, деб ҳисобланилар эди. Аммо кейинроқ олимлар кўршапалаклар Эбола вируси тарқалишида иштирок этганини аниқлади, айнан шу ушбу жониворларни касаллик тарқатувчилар сифатида ўрганиш муҳимлигини аниқлаб берди.
Тадқиқот натижасида олинган маълумотлар кўршапалаклар қони таркибида одамлар учун ҳам хавфли бўлган бир нечта турдаги инфекция ва паразитлар аниқланган бир пайтда айниқса муҳимдир.
Изоҳ (0)