Динозаврлар даврида Антарктидада яшаган жониворлар қолдиқларини ўрганиш Ернинг жанубий қутбидаги ҳаёт денгизлар ва қуруқликда яшовчиларни ҳозирги Мексика ҳудудига астероид тушиши оқибатида деярли ўша заҳоти нобуд бўлишдан асраб қолмаганини кўрсатди. Бу ҳақда палеонтолог олимлар Nature Communications журналида эълон қилинган мақолада маълум қилган, дея хабар беради «РИА Новости».
«Тадқиқотларимиз натижасида шундай манзара ҳосил бўлмоқда: Антарктика денгиз ва қуруқликларида бир кун ҳаёт гуллаб-яшнаб турган бўлса, эртасига бундан асар ҳам қолмаган. Нимадир кутилмаган ва ҳалокатли ҳолат рўй бергани кўриниб турибди. Бу эса қирилиб кетишнинг асосий сабабчиси иқлим ўзгариши ва вулқон фаоллиги эмас, астероид қулаши бўлганини кўрсатади», — дея таъкидлаган Буюк Британиядаги Лидс университети тадқиқотчиси Жеймс Уиттс.
Лидс университети ҳамда Британия Антарктика экспедицияси вакиллари Антарктика ярим ороли шимолий чеккасидаги Сеймур оролида мезозой даврига оид сувликда яшаган жониворлар «қабристони»ни топгандан сўнг Уиттс ва унинг ҳамкасблари шундай хулосага келди. Умумий ҳисобда бу ердан Антарктида қирғоқлари яқинидаги океанларда 65—62 миллион йил аввал истиқомат қилган аммонит, шиллиқ қурт, бошқа моллюскалар, шунингдек, улкан денгиз калтакесаклари (мозазаврлар) каби сув жониворларининг тахминан 6,5 мингта турини аниқлашга муваффақ бўлинди.
Изоҳ (0)