Гана пойтахти Аккрадан 753 километр шимолда жойлашган Тамале шаҳри ҳудудида номаълум шахсларнинг қуролли ҳужуми оқибатида бир киши ҳалок бўлди, яна 16 киши жароҳат олди. Бу ҳақда, «Синьхуа» агентлиги маълумотига таяниб, «ТАСС» хабар беради.
Агентликнинг маълум қилишича, 28 май, шанба куни кечки пайт номаълум шахслар коммунага ҳужум қилганда, унинг аҳолиси футбол бўйича Европа Чемпионлар Лигаси финал ўйинини томоша қилаётган эди. Гувоҳларнинг сўзларига қараганда, жангарилар электр таъминотини узиб қўйиб, томошабинларга қарата тартибсиз ўқ узган. Натижада камида бир нафар тинч аҳоли вакили ҳалок бўлган, 16 киши, жумладан, олти нафар бола, саккиз нафар аёл ва икки эркак яраланган.Ҳодисанинг юзага келиш сабаблари ҳозирча номаълум. Маҳаллий аҳолининг тахминича, ҳужум кафарба ва калампор қабилаларининг сардорлари ўртасидаги можаро билан боғлиқ бўлиши мумкин. Полициянинг маълум қилишича, жиноят бўйича суриштирув бошланган.