Чаднинг собиқ президенти Хиссен Хабре инсониятга қарши жиноятларни содир этишда айбдор деб топилиб, бир умрлик қамоқ жазосига ҳукм қилинди. Бу ҳақда Дакардаги махсус трибуналнинг хулосасида айтилди, деб ёзмоқда «ТАСС».
Хиссен Хабре ҳарбий жиноятлар, инсониятга қарши жиноятлар, қулликда ушлаб туриш, қасддан қотиллик содир этиш, тизимли равишда оммавий қирғинлар уюштириш, инсонларни ўғирлаш, қийноққа солиш, инсонларни ноқонуний равишда зўрлик билан тутиб туришда айбланди.
Чиқарилган ҳукмни ҳуқуқ ҳимоячилари ҳам қўллаб, улкан ғалаба сифатида баҳолади. Хабренинг адвокатлари икки ҳафта мобайнида апелляция инстанциясига мурожаат қилиши мумкин.
2015 йил 20 июлидан буён давом этаётган суд эшитувларини кўпгина кузатувчилар муҳим тарихий воқеа деб баҳоламоқда, негаки Африканинг бир давлати раҳбари биринчи марта қитъанинг бошқа давлати судида жавобгарликка тортилди — махсус трибунал Дакарда, Сенегал ҳукумати билан келишув асосида Африка Иттифоқи тарафидан ташкил этилди.
1982–1990 йилларда Чад президенти бўлган 73 ёшли Хиссен Хабре «Африка Пиночети» номини олган. Ҳуқуқ ҳимоячиларининг фикрича, у 40 мингдан ортиқ одамнинг ўлимида айбдор.
Изоҳ (0)