Украина президенти Пётр Порошенко, ҳарбий хизматчи Надежда Савченко мамлакатга қайтарилганидек, Донбасс билан Қримни ҳам қайтариб олишга ваъда берди. Бу ҳақда у президент маъмуриятидаги чиқишида айтиб ўтди, деб хабар бермоқда Meduza.
Россияда 22 йилга озодликдан маҳрум этиш жазосига ҳукм қилинган украиналик ҳарбий учувчи Надежда Савченко 25 май куни РФ президенти Владимир Путин томонидан афв этилиб, Украинага топширилди. У Киевга Украина президенти самолётида олиб келинди.
Ўз навбатида, Порошенко Донбассдаги ҳарбий тўқнашувларда иштирок этгани учун Украинада судланган Россия фуқаролари Евгений Ерофеев ва Александр Александровларни афв этди; улар Москвага юборилди.
Украина президенти Германия канцлери Ангела Меркелга, Франция президенти Франсуа Олландга ва бошқа сиёсатчиларга Савченкони озод қилишда кўрсатилган ёрдам учун миннатдорлик билдирди. У режиссёр Олег Сенцов ҳамда Россияда тутиб турилган бошқа Украина фуқароларини озодликка чиқариш йўлидаги ҳаракатни давом эттиришини айтиб ўтди.
Порошенкодан сўнг Савченко чиқиш қилди. У кўплаб украиналиклар Донбассда ҳалок бўлган бир пайтда тирик қолгани учун кечирим сўради.
Порошенко Савченкони «Олтин Юлдуз» ордени билан тақдирлади. Ушбу орден Украина Қаҳрамони унвонига сазовор бўлган фуқароларга тақдим этилади.
Изоҳ (0)