Буюк Британия бош вазири Дэвид Кэмерон Туркия Европа Иттифоқига 3000 йилдан аввал аъзо бўла олмаслигини айтиб ўтди. Бу ҳақда Meduza хабар бермоқда.
«Улар Европа Иттифоқига аъзо бўлиш учун 1987 йилда ариза берган. Агар воқеалар ҳозирги тезликда ривожланадиган бўлса, сўнгги тахминларга кўра, улар 3000 йил арафасида Иттифоққа кириши мумкин», — деди Кэмерон Peston on Sunday кўрсатувида.
Кэмероннинг айтишича, Европа Иттифоқига янги давлатлар қўшилиши масаласида Буюк Британия вето ҳуқуқига эга. Аввалроқ мамлакат мудофаа вазири Пенни Мордонт Буюк Британия Туркиянинг Евроиттифоққа қўшилишига қаршилик қила олмаслигини айтиб, бўлажак референдумда британияликларни Евроиттифоқдан ажралиб чиқиш учун овоз беришга чақирган эди.
Буюк Британиянинг Европа Иттифоқи таркибидан чиқишига қаратилган тарғибот кампанияси вакили Майкл Гоув Туркиянинг Евроиттифоққа эҳтимолий қўшилишини Буюк Британия учун таҳдид деб атаган, таҳдидга асос сифатида Туркияда туғилиш ва жиноятчилик даражаси юқори эканлигини кўрсатган.
Буюк Британияда 23 июнь куни мамлакатнинг Европа Иттифоқидан ажралиб чиқиши масаласида референдум бўлиб ўтади. Бош вазир Дэвид Кэмерон мамлакатнинг иттифоқ таркибида қолиши учун овоз беришга чақирмоқда. Февраль ойида у Евроиттифоқнинг бошқа мамлакатлари раҳбарлари билан Буюк Британиянинг алоҳида мақоми борасида келишиб олган эди.
Туркия НАТО аъзоси ҳисобланади ва 1996 йилдан бери Европа Иттифоқи билан божхона иттифоқига киради. Мамлакат Европа Иттифоқига кириш учун 1987 йили ариза берган, 1999 йили номзод мақомини олган.
2016 йили Европа Иттифоқи ва Туркия Греция ҳудудига Туркия орқали кириб келган ноқонуний муҳожирларни ортга қайтариш борасида келишиб олган эди. Бунинг эвазига Евроиттифоқ Туркия фуқаролари учун виза тартибини енгиллаштириш ва мамлакатнинг Иттифоққа қўшилиши жараёнини тезлаштиришга ваъда берган.
Изоҳ (0)